زي أي يوم ، أنزل النهاردة عشان أنزل و أخرج بمناسبة عيد الأضحى المبارك . نزلت من بيتنا و ركبت عربية واحد من صحابي و في العربية ييجي السؤال المنطقى ذو الاجابة الصعبة : يا ترى أيه هو المكان اللي ممكن نروحه ؟ جه في دماغنا على طول واحد من المولات الشهيرة عشان نروحه و فعلاً مفكرناش كتير . دارت العربية و طلعنا على هناك . وصلنا و نزلنا من العربية ، اتمشينا شوية و بنهزر لحد ما وصلنا للبوابة . جايين نخش راح واقف أدامنا واحد من السيكيوريتي بيقولنا : معلش يا جماعة مينفعش تخشوا . طب و بالنسبة للناس اللي لسه داخلين ؟ معلش أصل مش مسموح بالدخول غير للكابلز و العائلات . طب و إحنا ؟ معلش يا فندم ، إحنا آسفين . إحنا اتصدمنا ساعتها بس ضحكنا للصبح و إحنا راجعين للعربية . و كالعادة ، لازم أنا اتألق بقى و بعد لما اليوم يخلص آخد لي جمب و أفكر مع نفسي شوية :
أيه اللي حصل النهاردة ده ؟ ليه مدخلوناش ؟ موصلنيش دماغي غير لحل واحد . مدخلوناش عشان خايفين إننا نخش المول نعاكس . الكوميدي بقى في الموضوع هو الحل اللي ممكن حل بيه المشكلة دي . الحل ببساطة هو عشان أخش بقى لازم أظبط فصقفة معايا بقى للبلد . البلد اللي مشيت في يوم من الأيام على نظام و بتكمله في العيد ده ، نظام اسمه الانفتاح مع اختلاف المفهوم في المدتين . يمكن أنا معرفش أوي مفهوم الانفتاح اللي كان في أيام السادات لكن أنا فاهم كويس أوي الانفتاح اللي حصل النهاردة . تعالوا بقى لما أفهمكم النظام الجديد . من الآخر دي دعوة للشباب عشان التظبيط . تعالوا بقى زي ما فكرنا في الحل للدخول للمول ، نفكر في العواقب :
1- الشاب من دول لما يحب يخش المول ده و مش قادر هيفكر في الحل ده و هيبقى عارف كويس ساعتها إنه و لا واحدة ترضى بيه عشان مفلس فهيشتغل و ده هدف نبيل و لو الشاب ده صايع هيعرف يتصرف :)
2- مستوى الشحاتة هيرتقي و بدل لما يتقال : حسنة قليلة تمنع بلاوي كتير ، هتبقى : لو سمحت ممكن تدخليني عند الباب و بعدين نسيب بعض جوا
3- البنت من دول مش لازم توصل بيتها عشان تترحم من اللي بيعاكسوها فعندها دلوقتي كمان بعد الكنيسة أو الجامع مول تتحامى فيه و بكده بقى المول في حالة تقديس
4- البطاقة مش كافية لاثبات الشخصية ، لازم يبقى معاك (أنت فاهم مين) عشان تثبت شخصيتك
أخيراً يتبقى سؤال : هو الكلام ده هيبقى في العيد بس و لا دايماً ؟ في كل الحالات أهلاً بالمفهوم الجديد ، أهلاً بالانفتاح و أهلاً أهلاً بالعيد .
